ХААН Банк

ХААН Банк нь орон даяар нийт 545 салбар нэгжтэй үндэсний хэмжээний тэргүүлэгч арилжааны банк бөгөөд Монгол Улсын нийт хүн амын 82 гаруй хувьд буюу 2.8 сая харилцагчид банк санхүүгийн цогц үйлчилгээг хүргэн ажиллаж байна.

Банк нь нэг шатлал бүхий улсын банкны тогтолцоо задарсан үе буюу 1991 онд орон даяар салбар нэгжтэй, Хөдөө Аж Ахуйн Хоршоологчдын банк нэртэйгээр байгуулагдсан түүхтэй. Улмаар улсын банкны хөдөө орон нутаг дахь хөрөнгө, үйл ажиллагааг өөртөө шилжүүлэн авч банк хувьчлагдсан ч бизнесийн үйл ажиллагаа нь төр засгийн хүчтэй нөлөөллөөс ангид байсангүй. Үүний дараа 2000 онд Дэлхийн банкны удирдлага дор банкийг эрүүлжүүлэх хөтөлбөр боловсруулж, тухайн үеийн Засгийн газраас банкийг өөрийн өмчлөлд авч, нэмэлт дахин хөрөнгөжүүлэх ажлыг хийсэн бөгөөд АНУ-ын Олон Улсын Хөгжлийн Агентлагийн тусламжтай удирдлагын шинэ баг томилогдон ажиллаж эхэлсэн түүхтэй. Эрүүлжүүлэх хөтөлбөр амжилттай хэрэгжсэн банкийг 2003 онд олон улсын тендер зарлан амжилттай хувьчилсан юм.

Тухайн үед  Банкны хувьцааг Япон улсын “Савада Холдингс” (Sawada Holdings) компани 100 хувь эзэмшиж байсан бөгөөд тухайн жилдээ Монгол Улсын “Таван Богд Трейд” ХХК нь Банкны хувьцааны 40 хувийг худалдан авснаар 2006 онд Монголын Хөдөө Аж Ахуйн Банк нэрээ өөрчлөн “ХААН Банк ХХК” болсон.

ХААН Банк нь Монгол Улсын Банкны тухай хуулийн 17 дугаар зүйлийн 2 дахь хэсэг, Монголбанкны Ерөнхийлөгчийн 2000 оны 375 тоот тушаалаар батлагдсан “Банк, түүний нэгж байгуулах зөвшөөрлийн журам”-ыг үндэслэн Монголбанкнаас 2006.11.22-ны өдөр олгогдсон “02” дугаар бүхий БАНКНЫ ЗӨВШӨӨРЛИЙН ГЭРЧИЛГЭЭТЭЙ болно. 

ХААН Банк үүсэн байгуулагдсанаас хойш 32 жилийн хугацаанд санхүүгийн хүчирхэг үзүүлэлт, найдвартай ганхашгүй байдлаараа харилцагчдынхаа итгэлийг бүрэн хүлээж чадсанаас гадна цаг хугацаа, орон зайнаас үл хамааран хэдийд ч хаанаас ч зайнаас авах боломжтой мобайл банк, интернэт банк, аппликэйшн, киоск зэрэг цахим бүтээгдэхүүн үйлчилгээг зах зээлд анхлан нэвтрүүлж, үүгээрээ уламжлалт банкны загварыг технологийн дэвшилд суурилсан цахим банк болгон шинэчлээд буй билээ. Бид цахим банкны хэрэглээг нэмэгдүүлж, теллерийн гүйлгээний ачааллыг бууруулахад анхаарч ажилласны үр дүнд орон даяар 231 гаруй Экспресс банк, 1,481 гаруй АТМ, 340 киоск машин, 29,000 гаруй КҮБ, 37,000 гаруй ПОС машинтай үйлчилгээний өргөн сүлжээг бүрдүүлж чадлаа.

Үүний үр дүнд 2023 оны эхний улирлын байдлаар Монгол Улсын хэмжээнд:

• Интернэт банкаар хийгдэж буй нийт гүйлгээний 78%

• АТМ-ын гүйлгээний 84%

• ПОС машины гүйлгээний 45%

• Мобайл банкны гүйлгээний 96%-ийг ХААН Банк дангаар гүйцэтгэсэн байна.

Үндэсний тэргүүлэгч банк болохын хувьд ХААН Банк нь банк санхүүгийн салбартаа харилцагчийн үйлчилгээгээр манлайлагч байх өндөр үүрэг хариуцлага хүлээдэг. Бид цахим банкны шинэчлэл, өсөлт дэвшилтэд тулгуурлан салбар тооцооны төв, Харилцагчийн мэдээллийн төв  цахим сувгуудаараа дамжуулан харилцагчийн үйлчилгээг улам сайжруулж, Монголдоо тэргүүлэх хэмжээний харилцагч төвтэй байгууллага болох зорилго тавин ажиллаж байна.

ХААН Банкны найдвартай тогтвортой үйл ажиллагаа, санхүүгийн хүчирхэг үзүүлэлтүүд, шуурхай үйлчилгээ, дэвшилтэт технологид суурилсан цахим банк, улс орон нийгмийн төлөө хийж буй ажлуудыг үнэлэн Монгол Улсын Засгийн газар, Монголын үндэсний худалдаа аж үйлдвэрийн танхимаас “Монгол Улсын ТОП-100 аж ахуйн нэгж”-ийн хоёрдугаарт эрэмбэлээд байна. Мөн олон улсад нэр хүндтэй “The Banker”, “Euromoney”, “Asiamoney”, “Global Finance”, “FinanceAsia”, “Global Banking and Finance Review” сэтгүүлүүд “Монгол Улсын шилдэг банк”, “Шилдэг цахим банк”, “Шилдэг иргэдийн банк”-аар тогтмол шалгаруулж буй билээ.

Түүнчлэн нийгмийн сайн сайханд чиглэсэн цогц төсөл, хөтөлбөрүүдийг тогтмол хэрэгжүүлж буйгаас “Хавдрын эсрэг үндэсний аян”, “Цусны даралт ихсэлтийн эсрэг аян”, ХААН Банкны нэрэмжит шинэ оюутны тэтгэлэгт хөтөлбөр, шинэ оюутны “Rise” хөгжлийн хөтөлбөр зэрэг нь олон нийтэд хамгийн их танигдаж, талархлыг хүлээгээд буй билээ.

ХААН Банкны албан ёсны вэбсайттай энд дарж танилцана уу.