Бидний тухай

“Лантуун дохио” ТББ нь хүний наймаа, хүчирхийллийг таслан зогсоох, түүнээс урьдчилан сэргийлэх, иргэдийг мэдлэг мэдээллээр хангах чиглэлээр  2013 оноос эхлэн тууштай үйл ажиллагаа явуулж буй шашин, улс төрөөс  ангид нийгэмд үйлчилдэг төрийн бус байгууллага юм.  Бидний алсын хараа эрүүл, аюулгүй нийгмийн төлөө бодлогод нөлөөлөх, хүний эрх болон хүчирхийллийн талаар иргэд, олон нийтийн ойлголт мэдлэгийг нэмэгдүүлж, хандлагад нөлөө үзүүлэх, болзошгүй эрсдэлээс урьдчилан сэргийлэх мэдлэг ойлголтыг таниулах, сурталчилах зорилго дор нэгдсэн салбар бүрийн залуусын нэгдэл юм.

Бид хэрхэн ажилладаг вэ?

Сайн дурын ажил:

• Жилд 2 удаа сайн дурын гишүүдийн элсэлт авдаг ба Сайн дурын ажлын цагийг ERP систем дээр бүртгэж, 100 дээш цаг цуглуулсан гишүүддээ албан ёсны батламж гардуулдаг. Түүнээс гадна сайн дурын гишүүдээ хүүхэд хамгааллын сургалтанд хамруулж, дотооддоо тэтгэлэгт хөтөлбөр болон төслийн уралдаан зарлаж хувь хүний хөгжил тал дээр нь анхаардаг.

• Мөн Монголын анхны сайн дурынхны үүр болох Volunteer Hub-г 2022 онд Этүгэн сургуультай хамтран үүсгэн байгуулсан.

Цар хүрээ:

• 2016 онд АНУ, 2021 онд Австрали улсад Лантуун Дохио ТББ-ийн албан ёсны салбарыг нээж гэрчилгээгээ авсан ба тус улсад ажиллаж амьдарч буй Монголчуудад нийгмийн оролцоогоо бодит болгох, хүүхэд багачуудын боловсролд хөрөнгө оруулах боломжийг бий болгосон.

• АНУлс дахь Лантуун Дохио ТББ олон улсын NCMEC хүүхдийн байгууллагатай хамтран цахим орчин дахь хүүхдийн эсрэг зөрчлийг холбогдох байгууллагуудад дамжуулдаг CyberTipLine ба сураггүй алга болсон хүүхдийг цахим орчноор дамжуулан шуурхай хайдаг Amber Alert системүүдийг Монгол дахь хэрэглэгчдэд нэвтрүүлэх төсөл хэрэгжүүлж эхэлсэн.

• 2020 онд НҮБ-ын Эдийн Засаг, Нийгмийн Хорооноос Лантуун Дохио ТББ-д Зөвлөлдөх эрх бүхий статусыг олгосон. Ингэснээр НҮБ-ээс гарах хүний наймаа, хүүхэд, эмэгтэйчүүдийн эсрэг хүчирхийлэл, хүүхдийн эрхтэй холбоотой зөвлөмж, заавруудад тус ТББ нь өөрсдийн үзэл бодлоо тусгах боломжтой болж, НҮБ-ээс зохион байгуулж буй хурал чуулганд төлөөлөгчөө оролцуулах, аман болон бичгэн хэлбэрээр мэдэгдэл хүргүүлэх эрхтэй болсон юм.

Нөлөөлөл: 

“Лантуун дохио” ТББ нь 2013 оноос эхлэн хүчирхийлэл, хүний наймаанаас урьдчилан сэргийлэх, холбогдох хууль тогтоомжийг олон нийтэд таниулах чиглэлээр олон талт үйл ажиллагаа явуулсаар ирсэн. Энэ чиглэлээр нөлөөлөл, сургалт, хөгжлийн ажлуудыг нийгмийн түвшинд өрнүүлж, иргэдийн оролцоог сайжруулах зорилготой Нүдээ нээ, Зэрэгцээ ертөнц, Лантуу хүүгийн богц, Гинжийг таслая,  Хүн бай, Хэрсүү гурвалжин, Зүгээр битгий хая, Мэдлэг бол миний бие хамгаалагч, Be human гэх  зэрэг чухал төсөл хөтөлбөр болон нөлөөллийн аянуудыг хэрэгжүүлсэн.

 Онцлох төслүүд:

• Ид шидийн уут:

Бид Нийслэлийн 9 дүүрэг болон Орон нутаг дахь Ид шидийн орон төвөөрөө дамжуулан “ИД ШИДИЙН УУТ” сайн үйлсийн аянг жил бүр уламжлал зохион байгуулдаг ба  гэр хорооллын алслагдсан хэсгийн айл өрхүүдээр тандалт судалгаа хийж, эрсдэлтэй нөхцөлд амьдарч буй хүүхдийг илрүүлэх, хамгаалах, болзошгүй эрсдэлээс урьдчилан сэргийлэх зорилготой бөгөөд цаашлаад шаардлагатай дэмжлэг, туслалцааг шууд хүргэх замаар нийгэм дэх иргэд болон залуучууд /Сайн дурын гишүүд/-ын бодит оролцоог нэмэгдүүлж, олон нийтэд нөлөөлөх зорилгоор 2014 оноос хойш тасралтгүй тус аянг зохион байгуулж байна. Энэхүү аян нь зөвхөн бэлэг тараах бус аянаар дамжуулан судалгаа хийх, дата цуглуулах, судалгааны үр дүнд үндэслэн дараа дараагийн төсөл хөтөлбөр, нөлөөллийн ажлуудаа зохион байгуулдаг 

Хүүхэд бүрт нандин дурсамж, аз жаргалаар дүүрэн шинэ жилийг бэлэглэхийн төлөө жил бүр 100-150 сайн дурын гишүүд Өвлийн өвгөн, цасан охин, хөгжилтэй хөөрхөн алиалагч нарын дүрд хувиран дунджаар 4000-5000 хүүхдэд хүрч ажилладаг. 

• Ид шидийн орон: 

Ид шидийн орон төсөл нь хүүхэд бүрд тэгш боломж тэгш хүртээмжийг олгох, хөгжлөөр дамжуулан хамгааллийн үйлчилгээг үзүүлэх зорилготой төсөл юм. 

Анх 2017 онд СХД, Баянхошуунд Ид шидийн орон төслийг 100 хувь олон нийтийн хандив дэмжлэгтэйгээр бүтээн байгуулж, хамгаалах байр болон хөгжлийн төвийг хосолсон ажиллуулж эхэлсэн.

2019 онд БЗД, Улиастайн шинэ эцэст Ид шидийн орон-2 төвийг мөн адил олон нийтийн хандив дэмжлэгээр бүтээн байгуулахдаа зөвхөн хөгжлийн төв буюу хамгаалах байргүйгээр бүтээн байгуулсан.

2022 онд Баянхошуун дахь Ид шидийн орон төвийн хамгаалах байрыг улсад хүлээлгэн өгч, тус төвийг 100 хувь олон нийтэд нээлттэй, хүүхэд хөгжил хамгааллын төв болгосон. 

Мөн 2022 онд 21 аймгийн дунд орон нутаг дахь анхны Ид шидийн орон жишиг төвийг байгуулах тендер зарлаж 19 аймгаас материал ирснээс Дундговь аймаг шалгарч 2022 оны 10 сард анхны жишиг төв нээлтээ хийв. 

2022-2024 оны хооронд 2 жилийн хугацаанд Дундговь, Хөвсгөл, Хэнтий, Говь-Алтай зэрэг аймгуудад нийт 4 Ид шидийн орон төвийг бүх дэлхийн Монголчуудын дэмжлэгээр бүтээн байгуулав.

2025 он. Баянхошуунд байрлах Ид шидийн орон төвийг менежментийн гэрээгээр Veloo санд 10 жилийн хугацаатайгаар ашиглуулах гэрээ байгуулсан ба тус төв нь урьдын адил хүүхэд хөгжлийн чиглэлээр болон анхан шатны эрүүл мэндийн тусламж, үйлчилгээ үзүүлэх эмнэлэгтэйгээр цаашид үйл ажиллагаа явуулахаар болов.

Улаанбаатар хот, Хөвсгөл, Хэнтий, Дундговь, Говь-алтай аймгуудад байрлах 5 Ид шидийн орон төвөөрөө дамжуулан жилд дунджаар 30 гаруй мянган хүүхдэд хүрч ажилладаг олон нийтэд нээлттэй төв билээ. Тус төв дээр 10-15 төрлийн сургалт дугуйлан 5-10 төрлийн төсөл хөтөлбөр хэрэгждэг ба хүүхэд өөрийн хүссэн дугуйландаа хамрагдах боломжтой. 

Сургалт дугуйлангаас гадна кофе шоп, номын сан, тоглоомын талбай, сагсны талбай, задгай театр зэргээр дамжуулан хүүхэд багачуудад эрүүл аюулгүй орчныг бүрдүүлж өгсөн нь хүүхэд хамгааллын хамгийн үр дүнтэй ажлуудын нэг болж чадсан. 

Лантуун дохио төрийн бус байгууллага нь Олон улсад хүлээн зөвшөөрөгдсөн, хүний наймаа, хүчирхийллийн эсрэг үндэсний сайн туршлагыг бүтээж түүнийгээ дэлхийн дахинд хуваалцаж, “Ид шидийн орон” хүүхэд хамгааллын хөгжлийн цогц систем бүхий салбаруудыг олон улсад нээж, тогтолцоо бодлогын түвшинд зөв өөрчлөлт хийн нөлөөлөх өндөр чадвартай, чадварлаг нарийн мэргэжлийн боловсон хүчин, хамт олонтой, дэлхийд хүний эрх шударга ёсны төлөө сайн дурын байгууллагын үлгэр жишээ хамт олон болох зорилготой хамт олон юм.